This post is also available in: Macedonian French Spanish German Russian English Serbian Slovenian Croatian Bosnian Bulgarian Italian
Mirë se vini në Shtëpinë lirike të Aco Shopovit, gjegjësisht, në portalin shumëgjuhësor që ofron një panoramë të gjerë fjalësh dhe fotografish të jetës dhe veprës së poetit maqedonas.
Ideja për një muze të tillë virtual dhe dinamik (planin e të cilit mund ta gjeni këtu) lindi në vitin 2012 me botimin dygjuhësor frengjisht-gjermanisht të disa poezive të zgjedhura të tij nën titullin Soleil noir/Schwarze Sonne. Ky botim dygjuhësor solli si rrjedhojë miqësinë poetike mes Rolan Kajzerit dhe Jasmina Shopovës të cilët janë edhe iniciatorët e kësaj Shtëpie lirike. Rolan Kajzeri është drejtor i shtëpisë botuese PHI nga Luksenburgu ( kujdeset edhe për hartimin teknik të portalit), kurse Jasmina Shopova është vajza e poetit dhe njëherit edhe interpretuese dhe përkthyese e poezisë së tij (kujdeset edhe për përmbajtjen e portalit gjithashtu).
Aco Shopovi, i lindur në vitin 1923 në Shtip, është një ndër themeluesit e poezisë bashkëkohore maqedonase si dhe bën pjesë në rradhët e poetëve më eminentë të Evropës Juglindore të shekullit XX. Ai vdiq në Shkup në vitin 1982, pas një lëngimi disavjeçar. Ky portal online është shtëpia e tij virtuale në hapsirat e së cilës vazhdon të jetojë vepra e tij.
Materiali i arkivor i botuar në Shtëpinë Lirike të Aco Shopovit vjen nga fondet personale të gruas Svetlana Shopova, djalit Vladimir Shopov (1948-2000) dhe “Fondit Aco Shopov” të Arkivit “Haralampie Polenakoviq të Akademisë së Shkencave dhe Arteve të Maqedonisë (ASHAM). Shfrytëzojmë rastin të faleminderojmë Akademinë që na mundësoi t’i digjitalizojmë dhe botojmë.
E faleminderojmë gjithashtu edhe Radiotelevizionin e Maqedonisë (RTM) i cili, për nevojat e këtij portali, ka digjitalizuar një numër të madh të emisioneve kushtuar Aco Shopovit dhe në këtë mënyrë ka kontribuar në pasurimin e Videotekës së Shtëpisë lirike të tij.
I shprehim faleminderime edhe Bibliotekës kombëtare dhe universitare “Shën Kliment Ohridski” në Shkup, e cila na vuri në dispozicion një numër botimesh të cilat nuk botohen më, kopertinat e të cilave tani mund t’i gjeni në Bibliotekën e Shtëpisë Lirike të Aco Shopovit.
Faleminderojmë edhe Ministrinë e Arsimit të Republikës së Maqedonisë e cila në vitin 2016 financoi shumicën e përkthimeve në gjuhën angleze dhe ruse të këtij portali online.
Shtëpia lirike e Aco Shopovit është promovuar në Universitetin “Shën Kirili dhe Metodi” në Shkup, më 8 tetor të vitit 2014. Më shumë informacione rreth promovimit mund të gjeni këtu, si dhe në reportazhin e Neda Bakevskës për TV Telma. Reagime nëpër media: Daily.mk dhe Time.mk.
