Ќе те сретнам после многу лета
Ќе те сретнам после многу лета,
после многу премрежја и дни.
Снежен повит в коси ќе ми цвета,
снежно-бела ќе бидеш и ти.
Без возбуда, без болка, без трепет
ќе ме плисне твојот леден сјај,
и срцето завејано в пепел
рамнодушно ќе прошепне: крај.
Сал можеби на лицето бледо
горчлив осмев ќе се јави пак:
на чувствата изгаснати – сведок,
на страстите истлејани – знак.