Денови на поезијата, 2026

Од 14 до 16 мај 2026 година, Фондацијата „Ацо Шопов – Поезија“ го организира третото издание на Деновите на поезијата, во Скопје Сити Мол, продолжувајќи да гради мостови меѓу поетските генерации: од основоположниците, преку афирмираните автори, до најмладите гласови кои допрва ги обликуваат идните хоризонти на македонската поезија.

Манифестацијата и годинава започнува со одбележување на значајни јубилеи: Васил Куноски и Волче Наумчески (родени 1916), Блаже Конески (1921), Видое Видичевски, Илхами Емин, Анте Поповски, Љупчо Стојменски и Љубен Ташковски (1931), Петар Т. Бошковски и Михаил Ренџов (1936), Светлана Христова-Јоциќ (1941), Атанас Вангелов и Васил Пујовски (1946).

Во текот на Деновите на поезијата, ги одбележуваме и јубилејните родендени на Јован Стрезовски (95), Иван Чаповски (90), Ефтим Клетников (80), Катица Ќулавкова и Ванчо Полазаревски (75), и Гордана Јовиќ-Стојковска (65).

Современите македонски поети, меѓу кои се и Лира Бојку, Ристо Василевски, Вероника Димоска,  Саранда Мехмеди, Нино Наумовски, Елена Пренџова, Михајло Свидерски, Милена Силјаноска, Стефан Спасовски, Виолета Танчева-Златева и Лејла Шериф Емин учествуваат во настаните „Во дослух со Шопов“, „Поети и препеви“ и „Ново раѓање на зборот“.

Надвор од националните граници, годинава почесна гостинка на Деновите е Дорис Карева од Естонија, која се вбројува во најзначајните европски поети денес. 

Музиката исто така има видно место во програмата, со настапот на ПОЕТРОНИКА под наслов: „Кон Ацо Шопов“, во Синеплекс.

Годинава се навршуваат и 55 години од првото издание на „Златно славејче“, како и 90 години од раѓањето на Александар Џамбазов, кој заедно со Васил Пујовски го иницираше овој фестивал. Затоа, во сабота 16 мај, поетската сцена на фондацијата „Ацо Шопов-Поезија“ и Скопје Сити Мол се претвора во еден прекрасен поетски и музички лавиринт, низ кој публиката ја води Игор Џамбазов.