Стипендија „Ацо Шопов“

Фондацијата „Ацо Шопов – Поезија“ која има за цел да го негува и промовира творештвото Ацо Шопов и да го возобновува интересот за македонската поезија и култура, особено кај младата публика, во земјата и надвор до неа, воведе програма за стипендирање млади истражувачи од втор и трет циклус студии.

Стипендиите се наменети за студенти во полето на хуманистиката кои во својот пристап ги инкорпорираат вредностите со кои се одликува творештвото на Ацо Шопов, односно: хуманизам, космополитизам, мултикултурализам и интеркултурна комуникација, еднаквост, толеранција и сл., а во доменот на научноистражувачката методологија се придржуваат до современите научни парадигми.

Услови за доделување на стипендиите

Имаат право да конкурираат студенти:

• запишани на втор и трет циклус студии;
• чија тема на магистерски или докторски труд е веќе прифатена од наставно-научниот совет на факултетот на кој студираат;
• чиј магистерски или докторски труд ѝ е посветен најмалку во една третина на македонската современа поезија и најмалку во една четвртина на творештвото на Ацо Шопов;
• кои во текот на студиите постигнале најмалку 8 просечен успех.

Начин на пријавување

Кандидатите треба електронски да ги достават следниве документи:

• Молба;
• Кратко CV;
• Опис на трудот (од 1200 до 1500 збора, за магистерски труд; и од 2500 до 3000 збора за докторски труд);
• Препорака од менторот (до 600 збора);
• Одлука на наставно-научниот совет за прифаќање на темата.

Документите треба да бидат испратени на: acosopov.fondacija@gmail.com

Роковите за пријавите се најавуваат секоја година.

Документите на кандидатите кои се некомплетни и неблаговремено доставени не се разгледуваат.

Решението на жири комисијата им се испраќа на кандидатите во рок од 30 дена по приемот на кандидатурата.

Одбиените кандидати немаат право на жалба. но можат да се пријават следните години, најмногу до трипати.

Видови и висина на стипендиите „Ацо Шопов“

Жири комисијата на стипендијата „Ацо Шопов“, составена од членови на фондацијата „Ацо Шопов – Поезија“ и еминентни универзитетски професори, доделува:

• магистерска стипендија, во износ од 1500 евра
• докторска стипендија, во износ од 3000 евра

Начин на исплата на стипендијата „Ацо Шопов“

Магистерската стипендија е исплатена двократно, во текот на една година по доделувањето на стипендијата;
Докторската стипендија е исплатена трикратно, во текот на две години по доделувањето на стипендијата.

Стипендистите потпишуваат договор со фондацијата „Ацо Шопов – Поезија“ со кој детално се уредени правата и должностите на двете страни.