Pulëbardhës që sillet rreth kokës sime

Pulëbardha ime,
mos u ul mbi sytë e mi.
te këto brigje të shqyera s’ka asnjë stom.

Zhytu në çdo thellësi,
fluturo mbi çdo lartësi
dhe lërmë të marrë pak dritë nga ty
Pulëbardha ime, unë s’kam më sy.

Mos u ul mbi zemrën time!
Pulëbardha ime, zemra s’është e imja:
përshko çdo vend të pashkelur ndonjëherë,
kalo përkrah gjithë të gjallëve,të rënëve, të panjohurve.

Vështroji gjithë të vetmuarit, të braktisurit,
dhe gjithë majat e akullta e livadhet plot blerim,
dhe dëgjo-
teksa krahu yt mbi to lakohet qetësisht
se si zemra ime brenda tyre rreh gjithë gulçim!

Pulëbardha ime fluturimin mos e ndal,
kthehu në tufën tënde prapë.
Një varkëz e ndëshkuar, unë jam
të përplasem me të panjohurën orë e çast.

Aco Shopov, Shkrihu me heshtjen (Слеј се со тишината), 1955
Përktheu Saranda Mehmedi, 2021